Í ágúst koma til landsins 31 erlendir skiptinemar til Íslands á vegum AFS. Nemarnir eru á aldrinum 15-18 ára, ganga í skóla út um allt land og dvelja hér í þrjá og tíu mánuði. Fósturfjölskyldur útvega nemunum fæði og húsnæði en annan kostnað greiðir neminn sjálfur, t.d. tómstundir og vasapening. AFS sér um að skrá nemann í skóla, greiðir skólagjöld og námsbækur og aðstoðar við aðlögun t.d. með námskeiðum.

Fósturfjölskyldur gera starf AFS mögulegt

Á hverju ári taka 10.000 fósturfjölskyldur, í 54 löndum þar sem AFS starfar, á móti skiptinemum.  AFS hefur áratuga reynslu af nemendaskiptum þar sem samtökin hafa starfað í rúmlega 50 ár í fjölmörgum löndum í heiminum og fleiri þúsund skiptinemar og fósturfjölskyldur hafa tekið þátt í starfsemi AFS.

Fólk sem hefur áhuga á fólki og löngun til þess að kynnast veröldinni á að grípa tækifærið og taka að sér skiptinema.

Allt sem þið þurfið er hjartarými, löngun til að læra eitthvað nýtt, kímnigáfu  og sveigjanleika. 

Þeir sem hafa áhuga á nánari upplýsingum geta haft samband við skrifstofu AFS á Íslandi í síma: 552-5450 eða á [email protected]

Gavrilo (júlí 2001)

Gavrilo er 18 ára strákur frá Belgrade í Serbíu. Hann býr með foreldrum sínum og tveimur yngri bræðrum. Hann er duglegur að hjálpa til við heimilisstörfin og aðstoðar bræður sína með heimalærdóm.

Gavrilo er kátur og hugmyndaríkur. Hann leggur mikið upp úr því að koma öðrum í gott skap í kringum sig.

Honum finnst gaman að vera með vinum sínum, spjalla um áhugamálin og um bókmenntir. Hann hefur einnig gaman að því að lesa, spila tölvuleiki, spila borðspil (t.d. Dungeons & Dragons) og hlusta á tónlist. Svo á fjölskyldan hund sem hann fer oft með út að labba.

Gavrilo hefur gaman að tungumálum. Hann er mjög góður í ensku, lærir frönsku og japönsku og hlakkar mikið til að læra íslensku líka.

Leo (febrúar 2002)

Leo er 17 ára og kemur frá Noregi. Þar býr hann á litlum sveitabæ með móður sinni og yngri systur sem hann er mjög náinn.

Leo og fjölskylda hans eiga nokkur dýr, þar á meðal hesta, tvo hunda og ketti og fjögur lamadýr. Leo er mjög hændur að dýrum og er duglegur að hugsa um þau.

Leo er mjög ljúfur drengur og á fáa en nána vini. Hann er sjálfstæður, rólegur og hefur mikinn áhuga á sagnfræði. Hann stundar ekki neina sérstaka íþrótt en hefur gaman að fjallgöngum og því að fara á skíði.

Hann er duglegur námsmaður og eru uppáhalds fögin hans sagnfræði og tungumál. Móðir hans lýsir honum sem kurteisum og duglegum dreng og sé eldri en aldur hans segir til um.

Benjamin (mars 2002)

Benjamin er 17 ára drengur frá Santiago í Chile. Þar býr hann með foreldrum sínum, eldri systur og yngri bróður.

Hann er rólegur drengur sem er nánast alltaf í góðu skapi, hann lítur á lífið með jákvæðum augum.

Hann æfir körfubolta í skólanum og hefur mjög mikinn áhuga á bæði körfubolta og fótbolta. Hann horfir mikið á fótbolta með pabba sínum. Hann er mjög virkur í félagslífi í kringum sig hvort sem það er í körfuboltanum, skólanum eða í kirkjusamfélaginu.

Hann er mjög spenntur að koma til Íslands, kynnast menningunni og nýju fólki.