Í lok ágúst 2022 mun AFS á Íslandi taka móti 24 erlendum skiptinemum sem koma til með að vera hér á landi í 10 mánuði. Síðastliðin tvö ár hafa færri skiptinemar komist í skiptinám á Íslandi vegna Covid og þeirra samdráttaráhrifa sem faraldurinn hefur haft á tækifæri ungs fólks til að ferðast. AFS hefur sömuleiðis þurft að draga saman seglin sem hefur haft þau áhrif að færri komast að en vilja.

Skiptinemarnir sem koma í ágúst eru á aldrinum 15-18 ára, ganga í skóla út um allt land og dvelja hjá fósturfjölskyldum. Nú reynir á samtakamátt okkar allra að finna fjölskyldur í þessu erfiða ástandi svo við getum í boðið þessum nemum að láta draum sinn verða að veruleika og koma til okkar í skiptinám.

Fósturfjölskyldur útvega nemunum fæði og húsnæði en annan kostnað greiðir neminn sjálfur, t.d. tómstundir og vasapening. AFS sér um að skrá nemann í skóla, greiðir skólagjöld og námsbækur og aðstoðar við aðlögun t.d. með námskeiðum.

Fósturfjölskyldur gera starf AFS mögulegt

Á hverju ári taka 10.000 fósturfjölskyldur, í 54 löndum þar sem AFS starfar, á móti skiptinemum. AFS hefur áratuga reynslu af nemendaskiptum þar sem samtökin hafa starfað í rúmlega 60 ár í fjölmörgum löndum í heiminum og fleiri þúsund skiptinemar og fósturfjölskyldur hafa tekið þátt í starfsemi AFS. Fjölmargar íslenskar fjölskyldur hafa þegar opnað heimili sitt og mæla eindregið með þeirri reynslu og hvetja fólk sem hefur áhuga á að kynnarst borgurum heimsins að bjóða skiptinema inn í líf sitt.

Allt sem þið þurfið er hjartarými, löngun til að læra eitthvað nýtt og sveigjanleika. 

Þeir sem hafa áhuga á nánari upplýsingum geta haft samband við skrifstofu AFS á Íslandi í síma: 552-5450 eða á [email protected]

Finja (2006)

Finja er 15 ára knapi frá Þýskalandi og leitar að fósturfjölskyldu. Hún býr í litlu þorpi í miðju Þýskalandi hjá móður sinni, systur og tveim köttum. Hún elska hesta og reiðmennsku og vill gjarnan geta haldið því áfram hér á meðan dvölinni stendur. Helstu áhugamál hennar eru hestamennska, dýr, útivera, tónlist, lestur og líkamsrækt. Finja er hlý og hjálpsöm og nýtur þess að vera með vinum sínum. Hún er glaðvær og klár en getur virst feimin í byrjun en er fljót að kynnast fólki og á auðvelt með að eignast vini.

Finja hefur meðal annars áhuga á að verða kennari og vill því kynnast skólakerfinu á Íslandi. Hún hefur unnið á leikskóla og naut þess mikið. Hún vill verða hluti af fjölskyldu, sama hvernig fjölskyldumynstrið er, og geta átt fjölskyldu hér að dvöl lokinni. Það væri frábært fyrir Finju að komast í hesta fjölskyldu, hvort er í borg eða sveit.

Seira (2005)

Seira kemur frá Japan og býr í Oksaka með foreldrum sínum og tveim bræðrum. Hún er á fyrsta ári í framhaldsskóla í alþjóðanámi með áherslu á menningu. Hún er virk í erlendu samstarfi innan skólans.

Seira er róleg, þolinmóð, jákvæð, áhugasöm um fólk og menningu og er þess vegna virk í alþjóðastarfi í skólanum hennar. Hún hefur stundað margvíslegar íþróttir eins og tennis og körfubolta en segist ekki vera mjög góð í íþróttum þó hún njóti þess að taka þátt. Hún er í skólahljómsveit og er að læra að spila á franskt horn. 

Henni finnst gaman að ferðast skoða fallega staði og prófa nýjan mat. Ástæða þess að hún valdi Ísland er hér ríkir meira kynjajafnrétti en í Japan og vill Seira líka bæta tungumálakunnáttu sína og auka víðsýni. Þar að auki er Ísland öruggt land með fallega náttúru. Hún er spennt fyrir að geta farið í íslenska sveit og notið þar friðsældar.

Marie (2006)

Marie kemur frá Austurríki og býr til skiptis hjá foreldrum sínum. Hún á eldri bróðir og fjölskyldan samrýmd og ferðast saman og njóta tíma saman öll fjögur. Marie er frekar feimin í fyrstu en er fljót að aðlagast og þegar hún er orðin örugg á nýjum aðstæðum þá er hún mjög opin.

Henni er umhugað um velferð annarra og hugsar vel um alla í kringum sig. Marie hefur mikla unun af tónlist bæði að hlusta á hana og semja sjálf. Hún æfir söng í skólanum sínum og spilar einnig á gítar. Marie finnst gaman að lesa, fara út og skoða náttúruna, stunda íþróttir af mörgu tagi og að prófa nýja hluti. Marie kom með móður sinni til Íslands 2019 og heillaðist af landi og náttúru. Síðan þá hefur hún haft stóra drauma um að búa hér einn daginn.

Mike (2006)

Mike kemur frá Lettlandi og býr í Riga ásamt foreldrum sínum, yngri bróður, hundi og ketti. Mike er listrænn, ábyrgðarfullur, metnaðarfullur og leggur sig mikið fram um að vera vingjarnlegur. Hann segist vera bæði opinn og lokaður og þurfi stundum rólegheit til að hlaða batteríin.  

Hans helsta ástríða er að teikna en Mike hefur mikinn áhuga á öllu sem tengist list og finnst gaman að vinna skapandi verkefni af mörgu tagi. Mike hefur tekið þátt í lista- og bókmenntaklúbbum til að fá meiri reynslu og auka þekkingu sína á hinu listræna formi.

Mike hefur einnig mjög gaman af að eyða tíma með fjölskyldu og vinum. Honum finnst mjög gaman af því að spila borðspil, tölvuleiki og ferðast með þeim sem honum þykir vænt um. Mike valdi að koma í skiptinám til Íslands eftir að hafa komið með fjölskyldunni sinni til Íslands þar sem hann féll fyrir landi og þjóð. Hann hlakkar til að læra íslensku og kynnast nýrri menningu

Victor (2005)

Viktor kemur frá Síle, þar sem hann býr með foreldrum sínum, eldri bróður og tveimur yngri systkinum. Helstu kostir Viktors eru að hann er þolinmóður og góður við fólk í kringum sig. Hann er tillitssamur, forvitinn og metnaðarfullur og hefur verið að taka aukatíma í ensku til að búa sig undir að fara í skiptinám. 

Viktor hefur gaman af útivist og íþróttum. Hans helsta áhugamál er róður og hann rær sex til sjö sinnum í viku. Hann hefur gaman að því að púsla og spila borðspil með fjölskyldu eða vinum. Hann horfir ekki mikið á sjónvarpið og vill heldur spila tölvuleiki með vinum sínum. 

Viktor er ábyrgur nemandi sem fylgist vel með og fær góðar einkunnir, sérstaklega í vísindagreinum. Honum semur vel við skólafélaga sína og er viljugur til að hjálpa þegar á þarf að halda. Hann hefur mikinn áhuga á mannslíkamanum og almennu heilbrigði og stefnir á læknisfræði í framtíðinni.

Viktor hlakkar til að víkka sjóndeildarhringinn með því að búa í öðru landi og sjá hvernig annað fólk býr en kynna sína menningu á sama tíma. Hann langar öðlast aukið sjálfstæði með því að ferðast án fjölskyldunnar, eignast nýja vini og læra nýtt tungumál.

Chandler

Chandler kemur frá Bandaríkjunum, þar sem hann býr með móður og stjúpföður. Hann er líka í mjög góðu sambandi við pabba sinn og stjúpsystur og telur það styrkleika að hafa alist upp í blönduðu fjölskyldumynstri. Þess vegna eigi hann gott með að aðlagast mismunandi aðstæðum. Chandler er sjálfstæður, listrænn, hugulsamur og lífsglaður. Honum finnst mjög gaman af því að verja tíma með fjölskyldu og ættingjum og hefur einnig gaman af fjallgöngum, fara í útilegur og fara á ströndina. Chandler finnst líka gaman að halda spila- eða bíókvöld, sem og einfaldlega að hjálpa til við að elda kvöldmatinn.

Hann hefur mjög gaman af því að vinna í höndunum og þá helst hefðbundið handverk úr tré og járni, þar sem unnið er á gamla mátann allt frá grunni. Að auki hefur hann æft Jiu Jitsu og fer í ræktina til að lyfta. Chandler lærði leiklist í þrjú ár og er nú að læra skapandi skrif.

Hann hefur mikinn áhuga á tungumálum og mannfræði, sem er helsta ástæða þess að hann vill koma í skiptinám til Íslands og kynnast bæði íslensku og Íslendingum.

Mirko (2006)

Mirko er 16 ára ítalskur strákur sem býr í Róm með foreldrum sínum ásamt tveimur Labrador hundum, tveimur slöngum og tveim eðlum.

Honum er lýst sem forvitnum, vinalegum, kurteisum, feimnum og klárum strák sem elskar náttúruna og dýr. Honum finnst gaman að spila tölvuleiki og lesa myndasögur. Hann hefur áhuga á íþróttum og hefur æft fótbolta, sund, körfubolta, tennis og hjólabretti. Nú æfir hann júdó. Uppáhaldsfög hans í skólanum eru kínverska og heimspeki. Honum finnst gaman að læra tungumál og takast á við nýjar áskoranir.

Í framtíðinni stefnir hann á að ferðast og læra erlend tungumál. Hann er spenntur fyrir því að fara út fyrir þægindahringinn og prófa eitthvað nýtt, læra nýtt tungumál og kynnast öðru fólki og umhverfi.