Eftir margra mánaða undirbúning var Sjálfboðaliðanámskeið AFS haldið helgina 4.-6. október. Námskeiðið fór fram í Sumarbúðunum Ölveri undir Hafnarfjalli en þar komu saman rúmlega 30 AFSarar.
Í undirbúningsteyminu voru Alondra og Sólborg úr IPOT ásamt Steinunni og Tinnu af skrifstofunni. Með þeim voru einnig tveir þjálfarar en það voru Hildur úr IPOT og Mary-Paz frá AFS á Spáni sem kom sem Travelling Trainer í gegnum EFIL (Regnhlífarsamtök AFS í Evrópu). Tveir fjölskydumeðlimir voru sannfærðir um að standa vaktina í eldhúsinu og erum við mjög þakklát fyrir allan þann góða mat sem þau elduðu fyrir okkur en á námskeiðinu var einungis boðið upp á vegan fæði sem féll vel í kramið hjá þátttakendum.
Á námskeiðinu voru tvær brautir; grunnþjálfun fyrir nýja sjálfboðaliða og framhaldsþjálfun fyrir reyndari sjálfboðaliða. Þetta er í fyrsta sinn sem sjálfboðaliðanámskeið er haldið með þessum hætti og erum við mjög ánægð með hversu vel reyndist okkur að vera með tvær brautir í einu. Þetta auðveldaði hópnum að kynnast, deila reynslu og læra hvert af öðru.
Þáttakendur í framhaldsþjálfuninni tóku einnig þátt á tveggja vikna netnámskeiði sem fór fram áður en við hittumst í Ölveri. Netnámskeiðið var liður í tilraun AFS til að dýpka skilning þátttakenda á efni námskeiðsins og prófa okkur áfram með fræðslu á netinu en er það eitthvað sem við höfum áhuga á að þróa áfram til að jafna tækifæri á fræðslu milli landshluta.
Námskeiðið gekk verulega vel og fóru þáttakendur, þjálfarar, undirbúningsteymi og eldhúsvaktin heim með bros á vör að dagskrá lokinni. Í endurmati kom fram að margir þátttakendur væru til í að hafa fleiri námskeið sem þetta. Er sérstaklega áhugi fyrir þjálfunum um leiðtogahæfni og menningarlæsi. Undirbúningsteymið var sammála þessu og munum við skoða hvaða möguleikar eru á frekari þjálfunum og námskeiðum fyrir sjálfboðaliða í náinni framtíð.
Námskeiðið var styrkt af Æskulýðssjóði og þökkum við kærlega fyrir þann stuðning.
Texti: Tinna Sveinsdóttir