Upplýsingar fyrir foreldra

AFS býður upp margs konar prógrömm fyrir nemendur. Þeim býðst að sækja framhaldsskóla í dvalarlandinu í fullu námi yfir heilt námsár, í eina önn eða í þrjá mánuði. Menningarleg aðlögun, tungumálanám, tækifæri til sjálfboðastarfs og sértæk námskeið (svo sem rannsókn á tilteknum umhverfisþáttum eða nám í tiltekinni tækni) eru dæmi um skammtímaleiðir sem geta staðið yfir í nokkrar vikur og allt að þrjá mánuði.

• Skiptinemar AFS búa hjá fósturfjölskyldu í viðkomandi landi. AFS velur fósturfjölskyldurnar af kostgæfni í ítarlegu úttektarferli og býr þær vel undir að bjóða AFS-nemandann velkominn á heimilið. Þegar umsókn hefur verið samþykkt sjá starfsmenn og sjálfboðaliðar AFS á hverjum stað um að velja samfélag og fjölskyldu sem hentar þínu barni. Í örfáum undantekningartilvikum kann að vera að nemendur búi á heimavist og komi heim um helgar, eða í einhvers konar búðum, allt eftir því hvaða AFS-prógramm verður fyrir valinu.

Heilsa, öryggi og velferð nemenda okkar er algert forgangsatriði hjá AFS. Starfsmenn og sjálfboðaliðar AFS eru sérþjálfaðir til að veita nemendum og fjölskyldum þeirra stuðning og handleiðslu í gegnum allt AFS-ferlið. AFS starfar samkvæmt samræmdum viðmiðum sem taka til allra þátta starfsemi AFS. Allar AFS-deildir eru auk þess með neyðarsíma með sólarhringsþjónustu á hverjum stað, sem er vaktaður öllum stundum.

AFS-námsferlið og námskrá þess nær yfir AFS-upplifunina í heild, bæði fyrir og eftir skiptinámsdvöl barnsins þíns og tímabilið á meðan á henni stendur. Prógrammið byggir á þremur lykilmarkmiðum:

1. Að barninu líði vel hjá nýrri fjölskyldu og í nýjum skóla
2. Að barnið læri að eiga samskipti við og mynda vináttutengsl við fólk frá framandi menningarheimum.
3. Að barnið þroski með sér þá þekkingu, færni og skilning sem ungmenni þarf til að vera virkur þátttakandi, íbúi, námsmaður, starfsmaður, sjálfboðaliði eða leiðtogi í sífellt fjölbreyttara samfélagi heimsins.

AFS-námferlið og námskrá þess byggist á 16 AFS-námsmarkmiðum (þróuðum af alþjóðlegum sérfræðingum AFS á sviði menningarlæsis) undir handleiðslu þjálfaðs starfsfólks og sjálfboðaliða AFS. Hluti námsins felst í skemmtilegum og fræðandi námskeiðum í heimalandinu og dvalarlandinu, þar sem nemendur fá aðstoð við að undirbúa sig fyrir skemmtilega og fræðandi AFS-námsdvöl.

Námsmarkmiðum AFS er ætlað að styðja nemendur til náms og þroska á fjórum sviðum:

Persónuleg gildi og færni: Í krafti reynslu sinnar læra nemendur að breyta erfiðum aðstæðum í dýrmætt tækifæri til persónulegs þroska. Nemendur eru hvattir til að endurmeta eigin gildi, víkka út færnisvið sitt og beita í verki nýfenginni lífsleikni sinni og dýpka um leið sjálfsskilning sinn. Nemendur öðlast að öllu jöfnu aukið sjálfstraust, aukna færni til skapandi og gagnrýninnar hugsunar og læra að leysa þau vandamál sem þeir standa frammi fyrir.

Tengslamyndun: AFS-nemendur taka virkan þátt í daglegu lífi og starfsumhverfi margs konar fólks í nýja umhverfinu. Þetta fólk getur verið fólk úr fósturfjölskyldunni, íbúar í samfélaginu, kennarar og aðrir nemendur. Þessi færni mun nýtast nemendum við margs konar aðstæður og verkefni síðar á ævinni. Að vera hluti af fjölskyldu, skóla og samfélagi bætir samskipta- og tungumálakunnáttu nemenda og þjálfar ungmenni í að vinna með skilvirkari hætti í hópum og teymum.

Þekking og skilningur á menningu/menningarlæsi: AFS-skiptinámsdvöl dýpkar skilning nemenda á eigin menningu og veitir þeim innsýn í menningu fósturlandsins eða dvalarlandsins – jafnt styrkleika sem veikleika. Með því að læra að meta aðra menningarheima öðlast nemendur skilning á bæði menningarlegum mun og öðrum fjölbreytileika og læra að þessi fjölbreytileiki gerir heiminn okkar betri og áhugaverðari.

Aukin meðvitund um mikilvæg málefni: Nemendur læra að skilja og taka tillit til mismunandi sjónarhorna á hnattræn málefni og vandamál og gera sér um leið ljóst að hagnýtar lausnir þurfa oft að taka mið af menningaraðstæðum til að virka sem skyldi. Markmið okkar er að hvetja og efla nemendur til að vinna með öðrum að því að byggja upp friðsælan og réttsýnan heim.

Með því að sameina hagnýta reynslu af vettvangi og AFS-námskeiðin og námskrá þeirra hjálpa sjálfboðaliðar, starfsfólk og fósturfjölskyldur nemendum að:

• Læra hvernig hægt er að breyta krefjandi aðstæðum í tækifæri til að þroskast og eflast
• Læra nýjar aðferðir við úrlausn vandamála
• Nýta sér nýfengna lífsleikni í þvermenningarlegu umhverfi
• Læra að virða og meta fjölbreytileika
• Öðlast spennandi reynslu sem hjálpar ungmennum að þroska með sér borgaravirkni og að móta og skilgreina hlutverk sitt sem þátttakendur í sífellt fjölbreytilegra og alþjóðlegra námsumhverfi, samfélagi og vinnuumhverfi.
• Láta reyna á leiðtogafærni og samstarfsfærni í fjölbreyttu umhverfi.

Flestir skiptinemar kvíða því að ná ekki að falla í hóp jafningjanna, sérstaklega ef þeir tala ekki tungumálið. Að takast á við slíkar áskoranir er veigamikill þáttur í AFS-reynslunni, en flestir nemenda okkar aðlagast fljótt, eignast vini og eiga ánægjustundir um leið. Starfsfólk og sjálfboðaliðar AFS eru tilbúnir að aðstoða þá við hvert fótmál.

Ein leið til að fræðast meira um námsdvöl erlendis og hvernig maður eignast vini í öðrum löndum er að hitta aðra AFS-ara í sínu landi, kíkja á samfélagsmiðlana okkar eða fara á alþjóðlegu Facebook-síðu AFS til að mynda tengsl við skiptinema um allan heim.